Wednesday 14 July 2010
Зөвлөлгөө биш зөвлөгөө

 

Нэгэн үгийг хоёр янзаар бичиж хэвшсэний жишээ бол “зөвлөлгөө”, “зөвлөгөө” билээ. Чухам аль нь зөв бол, толь бичгүүдээс харцгаая. Хамгийн сүүлд хэвлэгдсэн ШУА-ийн Хэл Зохиолын Хүрээлэнгийн бүтээл “Монгол хэлний дэлгэрэнгүй тайлбар толь”-д энэ үгийг “Дагаж мөрдүүлэхээр хэлж сургасан юм” хэмээн тайлбарлаад “зөвлөгөө” хэмээн бичнэ гэжээ. Бид “зөвлөлгөөн” гэх бас нэгэн өөр үг байдагтай андуураад “зөвлөгөө” гэхийг “зөвлөлгөө” хэмээн буруу бичээд хэвшсэн ч байж болох юм.

Цаашлаад Ц.Дамдинсүрэн, Б.Осор нарын “Монгол үсгийн дүрмийн толь”, Чой.Лувсанжав нарын “Монгол бичгийн хадмал толь” гээд бүгдэд нь “зөвлөгөө” хэмээн байхаас “зөвлөлгөө” хэмээн алга. Харин Я.Цэвэлийн “Монгол хэлний товч тайлбар толь”-д энэ үгийг тайлбарласан зүйл алга. Монгол бичгээр энэ үгийг “зөблэгэ” хэмээн бичих ба үүнээс ч “зөвлөгөө” гэж бичих зөв нь харагдана. “Зөв” хэмээхээс “зөвлөх” гэдэг үйл үг үүсэх ба үүнээсээ “зөвлөгөө” хэмээн нэр үг үүсэж байгаа билээ.

Бичсэн: Боролзой | цаг: 17:56 | Бүх нийтийн бичиг үсгийн боловсролд
Холбоос | email -ээр явуулах | Сэтгэгдэл(2)
Сэтгэгдэл:


Нилээд эртнээс л зөвлөгөө гэж бичихгүй ээ гээд зөвлөлгөө болсон санагдах юм.
Бичсэн: Зочин цаг: 10:06, Tuesday 21 October 2014 | Холбоос | |


зөвлөлгөө
Намайг дунд сургуульд байхад манай багш яахын аргагүй л зөвлөлгөө гэж бичээд зөвлөгөө гэж уншина гэж зааж байсан юм. Монгол хэлэнд бичихдээ нэг өөр, уншихдаа нэг өөр үгнүүд байдагдаа. Та боломжтой бол дахин судлаад үзээч. Зөвлөлгөө гэж ганц ч байхгүй байна гэж баймааргүй юм. Би өөрөө түр хугацаагаар гадаадад байгаа тул ном сонин эргүүлэх боломжгүй байна. Би ч манай багшийн заасан зөв байгаасай л гэж бодож байна.
Бичсэн: Зочин (зочин) цаг: 18:09, Tuesday 3 January 2012 | Холбоос | |


Сэтгэгдэл бичих
idiomatic-dormant